തരവത്ത്‌ അമ്മാളു അമ്മ

1862ല്‍ പാലക്കാട്‌ തരവത്തു തറവാട്ടില്‍ ജനിച്ചു. മുന്‍സിഫ്‌ ശങ്കരന്‍ നായരുടെയും കുമ്മിണിയമ്മയുടെയും മകളാണ്‌ അമ്മാളു അമ്മ. ആതുര ശുശ്രൂഷയ്‌ക്കും ദാനധര്‍മ്മങ്ങള്‍ക്കും ഇവര്‍ പേര്‌ കേട്ടിരുന്നു. സ്വദേശാഭിമാനി രാമകൃഷ്‌ണപിള്ള നാടുകടത്തപ്പെട്ടപ്പോള്‍ അദ്ദേഹത്തിന്റെ കുടുംബത്തിന്‌ ഇവര്‍ ഒരു താങ്ങായിരുന്നു.

ശേഷന്‍ ഭട്ടര്‍ സംസ്‌കൃതത്തില്‍ രചിച്ച `ഭക്തമാല'യുടെ ഭാഷാന്തരീകരണത്തിലൂടെയാണ്‌ അമ്മാളു അമ്മ സാഹിത്യ രംഗത്തേക്ക്‌ കടന്നു വരുന്നത്‌. പ്രശസ്‌തരായ ഏതാനും ഭക്തരുടെ ജീവചരിത്രമായിരുന്നു അതിന്റെ ഉള്ളടക്കം. 

ഇവര്‍ ഒരു ബുദ്ധ ഭക്തയായിരുന്നു. `ബുദ്ധചരിതം' മലയാളത്തിലേക്ക്‌ തര്‍ജ്ജമ ചെയ്‌ത `ബുദ്ധഗാഥ' രചിച്ചു. കന്യാകുമാരി മുതല്‍ കാശിവരെ സഞ്ചരിച്ച്‌ `തീര്‍ത്ഥയാത്ര' എന്നൊരു ഗ്രന്ഥമെഴുതി. `ശിവശക്തി വിലാസം', `കൃഷ്‌ണഭക്തി ചന്ദ്രിക', `സര്‍വ്വവേദാന്തസിദ്ധാന്തസംഗ്രഹം' തുടങ്ങിയ കൃതികള്‍ മലയാളത്തിലേക്ക്‌ പരിഭാഷപ്പെടുത്തി. 1929ലെയും 1930ലെയും സാഹിത്യപരിഷത്‌ സമ്മേളനങ്ങളില്‍ അദ്ധ്യക്ഷത വഹിച്ചിട്ടുണ്ട്‌.