മാര്‍ത്തക്ക് ഗോള്‍ റെക്കോഡ്

വനിതാ ലോകകപ്പ് ചരിത്രത്തില്‍ ഏറ്റവും കൂടുതല്‍ ഗോള്‍ നേടിയതിന്റെ റെക്കോഡ് ബ്രസീല്‍ താരം മാര്‍ത്തയ്ക്ക്. ദക്ഷിണ കൊറിയക്കെതിരായ മത്സരത്തിലായിരുന്നു മാര്‍ത്തയുടെ നേട്ടം. ബ്രസീല്‍ രണ്ടു ഗോളിന് ജയിച്ച മത്സരത്തില്‍ മാര്‍ത്ത ഒരു ഗോള്‍ നേടി. ലോകകപ്പിലെ 15-ാം ഗോളായിരുന്നു ഈ ഇരുപത്തൊമ്പതുകാരിയുടേത്. മറ്റൊരു മത്സരത്തില്‍ ഫ്രാന്‍സ് ഇംഗ്ലണ്ടിനെ ഒരു ഗോളിന് തോല്‍പ്പിച്ചു. സ്പെയിന്‍-കോസ്റ്റാറിക്ക, മെക്സിക്കോ-കൊളംബിയ മത്സരങ്ങള്‍ 1-1ന് അവസാനിച്ചു.

ആറാം ലോകകപ്പിന് ഇറങ്ങിയ ഫോര്‍മിഗയുടെ ഗോളിലൂടെയായിരുന്നു കൊറിയക്കെതിരെ ബ്രസീല്‍ തുടങ്ങിയത്. ലോകകപ്പില്‍ ഗോള്‍ നേടുന്ന ഏറ്റവും പ്രായം കൂടിയ താരമെന്ന റെക്കോഡും ഇതോടെ ഈ മുപ്പത്തേഴുകാരിയുടെ പേരിലായി. കൊറിയന്‍ പ്രതിരോധ താരം കിം ഡോയിന്റെ പിഴവ് മുതലെടുത്തായിരുന്നു ഫോര്‍മിഗയുടെ ഗോള്‍.തുടക്കത്തില്‍ ഫാബിയാനയായിരുന്നു കൊറിയയെ വിറപ്പിച്ചത്. വലതുപാര്‍ശ്വത്തിലൂടെ ആക്രമിച്ചുകയറിയ ഫാബിയാന ഒരു തവണ ഗോളിന് അടുത്തെത്തി. തകര്‍പ്പനൊരു ലോങ്റേഞ്ചര്‍ ക്രോസ്ബാറില്‍ തട്ടിത്തെറിച്ചു. ബ്രസീലിന്റെ രണ്ടാം ഗോളിനും അവസരമൊരുക്കിയത് ഫോര്‍മിഗയായിരുന്നു.