രേണു രാജ് പട്ടികവർ​ഗ വികസന വകുപ്പ് ഡയറക്ടർ; ഡി ആര്‍ മേഘശ്രീ വയനാട് കളക്ടര്‍

സംസ്ഥാനത്ത് ഐഎഎസ് തലപ്പത്ത് മാറ്റം. വയനാട് ജില്ലാ കളക്ടറായിരുന്ന ഡോ. രേണു രാജിനെ പട്ടിക വർ​ഗ വികസന വിഭാ​ഗം ഡയറക്ടറായി നിയമിച്ചു. ട്രൈബൽ റീസെറ്റിൽമെന്റ് ആൻഡ് ഡെവലപ്മെന്റ് മിഷൻ സ്പെഷ്യൽ ഓഫീസർ, ട്രൈബൽ റീസെറ്റിൽമെന്റ് ആൻഡ് ഡെവലപ്മെന്റ് മിഷൻ മേധാവി എന്നീ അധിക ചുമതലയും നൽകിയിട്ടുണ്ട്. പട്ടികവർ​ഗ വികസന വകുപ്പ് ഡയറക്ടറായിരുന്ന ഡി ആർ മേഘശ്രീയെ വയനാട് കളക്ടറായി നിയമിച്ചു.

ഫിഷറീസ് ഡിപ്പാർട്മെന്റ് ഡയറക്ടറായ ഡോ. അദീല അബ്ദുള്ളയെ പുതുതായി സൃഷ്ടിച്ച അ​ഗ്രികൾച്ചറൽ ഡെവലപ്മെന്റ് ആൻഡ് ഫാർമേഴ്സ് വെൽഫെയർ ഡിപ്പാർട്മെന്റിന്റെ ഡയറക്ടറായി നിയമിച്ചു. ഒരുവർഷത്തേക്കാണ് നിയമനം. റവന്യൂ വിഭാ​ഗം അഡീഷണൽ സെക്രട്ടറി ബി അബ്ദുൾ നാസറിനെ ഫിഷറീസ് ഡിപ്പാർട്മെന്റ് ഡയറക്ടറായി നിയമിച്ചു.