ലക്ഷദ്വീപ് അഡ്മിനിസ്ട്രേറ്ററായ പ്രഫുല് പട്ടേലിനെതിരെ രൂക്ഷ വിമര്ശനവുമായി തൃണമൂല് കോണ്ഗ്രസ് നേതാവ് മഹുവ മൊയ്ത്ര. നിലവിലെ കേന്ദ്ര പ്രതിരോധ, വിദേശകാര്യ, റോഡ് ഗതാഗത മന്ത്രിമാര്ക്കെല്ലാം മൂന്ന് കുട്ടികള് വീതമുണ്ട്. ഈ സാഹചര്യത്തില് ലക്ഷദ്വീപിലെ രണ്ടില് കൂടുതല് കുട്ടികളുള്ള പഞ്ചായത്ത് അംഗങ്ങളെ അയോഗ്യരാക്കുന്ന കരട് നിയമം ദ്വീപിലെ അഡ്മിനിസ്ട്രേറ്റര് എങ്ങനെയാണ് അവതരിപ്പിക്കുകയെന്ന് മഹുവ ചോദിച്ചു. നേരത്തെ ലക്ഷദ്വീപില് വികസനത്തിന്റെ പേരില് ജനവിരുദ്ധ നയങ്ങള് നടപ്പാക്കുന്ന കേന്ദ്ര സര്ക്കാരിനെതിരെയും അഡ്മിനിസ്ട്രേറ്റര്ക്കെതിരെയും അഭിഭാഷകനും ആക്ടിവിസ്റ്റുമായ പ്രശാന്ത് ഭൂഷണ് രംഗത്തെത്തിയിരുന്നു. വികസനം എന്ന പേരില് നടത്തുന്ന നടപടികളെ വിമര്ശിക്കുന്ന കാര്ട്ടൂണ് പങ്കുവെച്ചുകൊണ്ടാണ് പ്രശാന്ത് ഭൂഷണ് രംഗത്തെത്തിയിരിക്കുന്നത്. ‘ലക്ഷദ്വീപില് വികസനം വരുന്നു! ഇവിടെയുമിതാ വീണ്ടും അച്ഛേ ദിന് വരുന്നു,’ എന്ന കുറിപ്പിനൊപ്പമാണ് കാര്ട്ടൂണ് പങ്കുവെച്ചത്. തെങ്ങിന് കാവി പെയിന്റടിക്കുന്ന പ്രഫുല് പട്ടേലിനോട് ‘എന്റെ വീട്’ എന്ന് കരയുന്ന ലക്ഷദ്വീപുകാരന്റെ കാര്ട്ടൂണ് ആണ് ഭൂഷണ് പങ്കുവെച്ചിരിക്കുന്നത്. ലക്ഷദ്വീപുകാരനോട് ഞങ്ങള് ഇത് ഭംഗിയാക്കുകയാണെന്നാണ് പ്രഫുല് പട്ടേല് പറയുന്നത്. ചിത്രത്തില് ലക്ഷദ്വീപില് നടപ്പാക്കിയ ഗുണ്ടാ ആക്ട്, ഫാം അടച്ചു പൂട്ടിയ നടപടി, ഹിന്ദു രാഷ്ട്രം എന്നിവയെല്ലാം സൂചിപ്പിക്കുന്നുണ്ട്.