കാഴ്ചയില്ലാത്ത ആദ്യ ഐഎഎസ് ഉദ്യോഗസ്ഥയായി പ്രഞ്ജില്‍ പട്ടീല്‍; തിങ്കളാഴ്ച തിരുവനന്തപുരം സബ് കലക്ടറായി ചുമതലയേല്‍ക്കും

അകക്കണ്ണിന്റെ വെളിച്ചത്തിന് നിശ്ചയദാര്‍ഢ്യം കൂട്ടായതോടെ കാഴ്ചയില്ലാത്ത ആദ്യ ഐഎഎസ് ഉദ്യോഗസ്ഥയായി മഹാരാഷ്ട്ര ഉല്ലാസ് നഗര്‍ സ്വദേശിയായ പ്രഞ്ജില്‍ പട്ടീല്‍. തിങ്കളാഴ്ച തിരുവനന്തപുരം ജില്ലയിലെ സബ് കലക്ടറായി പ്രഞ്ജില്‍ പട്ടീല്‍ ചുമതലയേല്‍ക്കും. കേരള കേഡറില്‍ സബ് കലക്ടറായി നിയമിക്കപ്പെടുന്ന ആദ്യത്തെ കാഴ്ചയില്ലാത്ത ഐ എ എസ് ഉദ്യോഗസ്ഥയാണ് പ്രഞ്ജില്‍.

സബ് കലക്ടറും തിരുവനന്തപുരം ആര്‍ ഡി ഒയുമായി തിങ്കളാഴ്ച ചുമതലയേല്‍ക്കുന്ന പ്രഞ്ജിലിനെ ആര്‍ ഡി ഒ ഓഫീസിലെ സീനിയര്‍ സൂപ്രണ്ട് ടി എസ് അനില്‍കുമാറിന്റെ നേതൃത്വത്തില്‍ ലളിതമായ ചടങ്ങുകളോടെ സ്വീകരിക്കും.

ഏകദേശം മൂന്ന് വർഷം മുമ്പ് ഉൽഹാസ്നഗറിൽ നിന്നുള്ള പ്രഞ്ജൽ പാട്ടീൽ തന്റെ ആദ്യ ശ്രമത്തിൽ 2016 ലെ യൂണിയൻ പബ്ലിക് സർവീസ് പരീക്ഷ 773 റാങ്കോടെ പാസ്സായി. ആറുവയസ്സുള്ളപ്പോളാണ്  പാട്ടീലിന് കാഴ്ചശക്തി പൂർണമായും നഷ്ടപ്പെട്ടത്. 

കമല മേത്ത ദാദർ സ്കൂൾ ഓഫ് ബ്ലൈന്റിലായിരുന്നു  പാട്ടീലിന്റെ വിദ്യാഭ്യാസം.അതൊരു മറാത്തി മീഡിയം സ്കൂളായതിനാൽ വലിയ വെല്ലുവിളി നേരിടേണ്ടി വന്നു. സെന്റ് സേവ്യർ കോളേജിൽ നിന്ന് പൊളിറ്റിക്കൽ സയൻസിൽ  ബിരുദവും ജവഹർലാൽ നെഹ്‌റു സർവകലാശാലയിൽ (ജെഎൻയു) നിന്ന് ഇന്റർനാഷണൽ റിലേഷൻസിൽ ബിരുദാനന്തര ബിരുദം നേടി. തുടർന്ന് ഇന്റഗ്രേറ്റഡ് എംഫിലിനും  പിഎച്ച്ഡിയും.റെറ്റിനകളെ ബന്ധിപ്പിക്കാൻ പാട്ടീലിന് ശസ്ത്രക്രിയകൾ നടത്തിയിരുന്നെങ്കിലും അവ വിജയിച്ചിരുന്നില്ല.