ലൈംഗികാരോപണത്തെ തുടർന്ന് എന്‍.എസ്.യു.ഐ ദേശീയ പ്രസിഡൻറ് രാജിവെച്ചു

എൻ.എസ്.യു.എെ ദേശീയ അധ്യക്ഷന്‍ ഫൈറോസ് ഖാന്‍ രാജി വെച്ചു. ലൈംഗിക ആരോപണങ്ങളെ തുടർന്നാണ് രാജി. കോൺഗ്രസിൻെറ ദേശീയ തലത്തിലുള്ള വിദ്യാർഥി സംഘടനയാണ് എൻ.എസ്.യു.എെ. കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഫൈറോസ് ഖാന്റെ രാജി സ്വീകരിച്ചെന്നാണ് റിപ്പോർട്ട്. 

എൻ.എസ്.യു.എെ പ്രവർത്തക തന്നെയാണ് ഫൈറോസ് ഖാനെതിരെ പരാതി നൽകിയിരുന്നത്. ഇതുമായി ബന്ധപ്പെട്ട് പാർട്ടി തലത്തിൽ അന്വേഷണം നടത്താൻ മൂന്നംഗ കമ്മീഷനെ നിയോഗിച്ചിരുന്നു. കശ്മീരിൽ നിന്നുള്ള നേതാവാണ് ഫൈറോസ് ഖാൻ. യുവതി പോലീസിലും ഇദ്ദേഹത്തിനെതിരെ പരാതി നൽകിയിരുന്നു. 

ആരോപണം വന്നപ്പോൾ തന്നെ ഫൈറോസ് രാജി സന്നദ്ധത അറിയിച്ചിരുന്നുവെന്ന് എൻ.എസ്.യു.എെ ദേശീയ സെക്രട്ടറി സൈമൂൺ ഫാറൂഖി പറഞ്ഞു. ആരോപണങ്ങൾ അടിസ്ഥാനരഹിതമാണെന്നും ഇത് കോടതിയിൽ തെളിയിക്കുമെന്നും അദ്ദേഹം കൂട്ടിച്ചേർത്തു.