പഠിക്കണം എന്ന ആവശ്യവുമായി 16കാരി

പഠിക്കാനുള്ള ആഗ്രഹത്തിന് ഭര്‍ത്താവിന്റെ വീട്ടുകാര്‍ തടസ്സമായപ്പോള്‍ പെണ്‍കുട്ടി സഹായം തേടിയെത്തിയത് പോലീസിനരികെ.രാജസ്ഥാന്‍ ബുന്ദിയില്‍ നിന്നുള്ള 16കാരിയാണ് തന്റെ പഠിപ്പ് തടസ്സപ്പെടുത്തിയ ഭര്‍തൃവീട്ടുകാര്‍ക്കെതിരെ പരാതിയുമായി പോലീസിനെ സമീപിച്ചത്. പത്താം ക്ലാസ്സില്‍ പഠിക്കുകയായിരുന്ന പെണ്‍കുട്ടിയാണ് പഠനം മുടക്കിയ കാര്യം ഡെപ്യൂട്ടി പോലീസ് സൂപ്രണ്ടിനെയും സബ് ഡിവിഷണല്‍ മജിസ്‌ട്രേറ്റിനേയും വിളിച്ചറിയിച്ചത്. ബാലവിവാഹത്തിന് വീട്ടുകാരെ കസ്റ്റഡിയിലെടുത്ത പോലീസ്, 18 വയസ്സ് പൂര്‍ത്തിയായതിനുശേഷം മാത്രം ഇനി പെണ്‍കുട്ടി ഭര്‍തൃവീട്ടിലേക്ക് പോയാല്‍ മതിയെന്ന നിര്‍ദ്ദേശിച്ചു. അതുവരെ പെണ്‍കുട്ടിയെ സ്വന്തം വീട്ടില്‍ നിന്ന് പഠിക്കാന്‍ സൗകര്യം ഒരുക്കണം. നൈന്‍വ നിവാസിയായ പെണ്‍കുട്ടിയെ ആറുവര്‍ഷം മുമ്പാണ് കാന്‍പുരഗ്രമത്തിലുള്ള യുവാവിന് വിവാഹം ചെയ്ത് കൊടുത്തത്.