മലൈഗാവ് സ്ഫോടന കേസ് പ്രതി മത്സരിക്കുന്നത് തടയണമെന്ന് ഹർജി

മലൈഗാവ് സ്ഫോടനക്കേസ് പ്രതി പ്രഗ്യാ സിങ് ഠാക്കൂർ തെരഞ്ഞെടുപ്പിൽ മത്സരിക്കുന്നത് തടയണമെന്നാവശ്യപ്പെട്ട് ഹർജി. സ്ഫോടനത്തിൽ കൊല്ലപ്പെട്ട സയ്യിദ് അസർ നിസാറിന്റെ അച്ഛൻ നിസാർ അഹമ്മദ് സയ്യദാണ് മുംബൈ എൻഐഎ കോടതിയിൽ ഹർജി നൽകിയിരിക്കുന്നത്. 

തീവ്രവാദ കേസിൽ പ്രതിയായ പ്രഗ്യാ സിങ്ങിന്റെ ആരോഗ്യം മോശമാണെന്ന കാരണം പറഞ്ഞാണ് ജയിൽ മോചിതനായത്. ജാമ്യത്തിൽനിന്നാണ് പ്രഗ്യാ സിങ് ബിജെപി ടിക്കറ്റിൽ മത്സരിക്കുന്നത്. 

മലേഗാവ് സ്ഫോടനം 'കാവി ഭീകരത' എന്നു വിശേഷിപ്പിച്ച കോൺഗ്രസിനെ ശിക്ഷിക്കാനാണ് പ്രഗ്യാ സിങ്ങിന് പാർട്ടി അംഗത്വവും മത്സരിക്കാൻ സീറ്റും നൽകിയതെന്ന് കഴിഞ്ഞ ദിവസം അമിത് ഷാ ഭൂവനേശ്വറിൽ പറഞ്ഞിരുന്നു. 

മുതിർന്ന കോൺഗ്രസ് നേതാവും മുൻ മുഖ്യ മന്ത്രിയുമായിരുന്ന ദ്വിഗ്വിജയ് സിങ്ങിനെതിരായാണ് പ്രഗ്യാ സിങ് മത്സരിക്കുന്നത്. അതേസമയം പ്രഗ്യാ സിങ് ബിജെപിയിൽ ചേരുമെന്ന വിവരം അറിയിക്കാൻ വാർത്താ സമ്മേളനം വിളിച്ച ബിജെപി വക്താവ് ജി വി എൽ റാവുവിനെതിരെ കാൺപൂർ സ്വദേശിയായ ഡോക്ടർ ശക്തി ഭാർഗവ ഇന്ന് ഷൂ എറിഞ്ഞിരുന്നു. ന്യൂഡൽഹിയിലെ ബിജെപി ആസ്ഥാനത്ത് വാർത്താ സമ്മേളനം നടത്തുമ്പോഴായിരുന്നു സംഭവം.