രമ്യാ ഹരിദാസിനെതിരായ പരാമര്‍ശം; എ വിജയരാഘവന് താക്കീത്

എല്‍ഡിഎഫ് കണ്‍വീനര്‍ എ വിജയരാഘവനെ താക്കീത് ചെയ്ത് തെരഞ്ഞെടുപ്പ് കമ്മീഷന്‍. ആലത്തൂരിലെ യുഡിഎഫ് സ്ഥാനാര്‍ത്ഥി രമ്യാ ഹരിദാസിനെതിരെ അപകീര്‍ത്തികരമായ പരാമര്‍ശം നടത്തിയെന്ന പരാതിയുടെ അടിസ്ഥാനത്തിലാണ് കമ്മീഷന്‍റെ നടപടി. എ വിജയരാഘവന്‍ പെരുമാറ്റച്ചട്ടം ലംഘിച്ചതായി കണ്ടെത്തിയതിന്‍റെ അടിസ്ഥാനത്തിലാണ് നടപടിയെന്ന് മുഖ്യതെരഞ്ഞെടുപ്പ് ഓഫീസര്‍ ടിക്കാറാം മീണ വ്യക്തമാക്കി. 

അതേസമയം വിഷയത്തില്‍ സംസ്ഥാന വനിതാ കമ്മീഷനെതിരെ വിമര്‍ശനവുമായി ആലത്തൂരിലെ യുഡിഎഫ് സ്ഥാനാര്‍ത്ഥി രമ്യ ഹരിദാസ് നേരത്തേ രംഗത്തെത്തിയിരുന്നു. കണ്ണൂരില്‍ കെ സുധാകരനെതിരെ പത്രവാര്‍ത്തയുടെ അടിസ്ഥാനത്തില്‍ നടപടി സ്വീകരിച്ച വനിതാ കമ്മീഷന്‍ തന്‍റെ പരാതി പരിഗണിച്ചതേയില്ലെന്ന് രമ്യ ഹരിദാസ് കുറ്റപ്പെടുത്തി. തന്നെ ഫോണില്‍ വിളിച്ച് വിവരം അന്വേഷിക്കാന്‍ പോലും കമ്മീഷന്‍ തയ്യാറായിരുന്നില്ല. ഇവിടെ നിയമം ഓരോരുത്തര്‍ക്കും ഓരോ തരത്തിലാണെന്നും കമ്മീഷന്‍ രാഷ്ട്രീയം കളിക്കുകയാണെന്നും രമ്യ കൂട്ടിച്ചേര്‍ത്തു. 

പൊന്നാനിയില്‍ നടന്ന തെരഞ്ഞെടുപ്പ് പ്രചാരണ പരിപാടിക്കിടെയാണ് രമ്യ ഹരിദാസിനെതിരെ അധിക്ഷേപകരമായ പരാമര്‍ശം നടത്തിയത്. ഇത് സ്ത്രീത്വത്തെ അപമാനിക്കുന്നതാണെന്ന് തെരഞ്ഞെടുപ്പ് കമ്മീഷന്‍ കണ്ടെത്തി. എ വിജയരാഘവന്‍ പെരുമാറ്റച്ചട്ടം ലംഘിച്ചതായി കമ്മീഷന്‍ കണ്ടെത്തിയിട്ടുണ്ട്, ഇതിന്‍റെ അടിസ്ഥാനത്തിലാണ് നടപടി.