‘ഈ മാപ്പപേക്ഷ മുറിവുണക്കലിന്റെ ചെറിയൊരു ആംഗ്യ പ്രകടനമായി വിലയിരുത്തുന്നു’; ക്ഷമ ചോദിച്ച അലന്‍സിയറിനോട് ഡബ്ല്യു.സി.സി

നടി ദിവ്യ ഗോപിനാഥ്ന്റെ പരാതിയിൽ മീ ടൂ വിവാദത്തിൽ അകപ്പെട്ട താരമായിരുന്നു അലൻസിയർ. അലൻസിയർ ഈ വിഷയത്തിൽ പരസ്യമായി മാപ്പു പറയണമെന്നായിരുന്നു ദിവ്യ പറഞ്ഞിരുന്നത്. ഇതേ തുടർന്ന് അലൻസിയർ തനിക്ക് പറ്റിയ തെറ്റ് സമ്മതിക്കുകയും മാപ്പു പറയുകയും ചെയ്തിരുന്നു.

നടൻ അലൻസിയറിന്റെ ഈ മാപ്പപേക്ഷ മുറിവുണക്കലിന്റെ ചെറിയൊരു ആംഗ്യ പ്രകടനമായി ഞങ്ങൾ വിലയിരുത്തുന്നു.എന്ന് ഡബ്ല്യു.സി.സി പ്രതികരിച്ചു. ഫേസ്ബുക്ക് പേജിലൂടെ ആയിരുന്നു ഡബ്ല്യു.സി.സി തങ്ങളുടെ പ്രതികരണമറിയിച്ചത്. കൂടാതെ പരസ്യമായി ക്ഷമ ചോദിച്ച അലന്‍സിയറിന്റെ നിലപാടിൽ നടി ദിവ്യ ഗോപിനാഥ് സന്തോഷം പ്രകടിപ്പിച്ചിരുന്നു

ദിവ്യ ആദ്യം ഒരു ബ്ലോഗ് പോസ്റ്റിലൂടെയാണ് പേര് വെളിപ്പെടുത്താതെ അലൻസിയറിനെതിരെയുള്ള ലൈംഗിക ആരോപണം നടത്തിയത്. വ്യക്തിപരമായി അലന്‍സിയറിനെ പരിചയപ്പെടുന്നത് വരെ തനിക്ക് അദ്ദേഹത്തോട് വലിയ ബഹുമാനമായിരുന്നു. ചുറ്റും നടക്കുന്ന കാര്യങ്ങളോടുള്ള അദ്ദേഹത്തിന്‍റെ പുരോഗമന സമീപനം സ്വന്തം വൈകൃതം മറക്കാനാണെന്നും ദിവ്യ ആരോപിച്ചിരുന്നു. ഇതിനു ശേഷം ദിവ്യ അലന്‍സിയറിനെതിരെ താര സംഘടന ‘അമ്മ’യ്ക്ക് പരാതി നൽകുകയും ചെയ്തു.