ആ ചിത്രങ്ങള്‍ എന്‍റേത്...

ബി ജെ പി എം എല്‍ എ അംഗുര്‍ലത ദേക എന്ന പേരില്‍ ചില ചിത്രങ്ങള്‍ ഇന്റര്‍നെറ്റില്‍ പ്രചരിക്കുന്നത് ശ്രദ്ധയില്‍ പെട്ടിരിക്കുകയാണ്. ഇത് ശരിക്കും അംഗൂര്‍ലത ദേകയല്ല. ഞാനാണ്. ഞാനെന്ന് വെച്ചാല്‍ സപ്ന വ്യാസ് പട്ടേല്‍. - ഫിറ്റനസ് ട്രെയിനറും മോഡലുമായ സപ്ന വ്യാസ് പട്ടേല്‍ തന്നെയാണ് ഇങ്ങനെ ഒരു വിശദീകരണം നല്‍കിയിരിക്കുന്നത്. ഇതോടെ, ഈ ചിത്രങ്ങള്‍ അംഗൂര്‍ലതയുടേതല്ല എന്ന് ഉറപ്പായിരിക്കുകയാണ്.
വാട്‌സ് ആപ്പ് ഗ്രൂപ്പുകള്‍ അടക്കമുള്ള സോഷ്യല്‍ മീഡിയ സൈറ്റുകളില്‍ ഈ വിവരം ഷെയര്‍ ചെയ്യണമെന്നും സപ്ന വ്യാസ് പട്ടേല്‍ പറയുന്നു. സത്യം അറിയാതെയാണ് ആളുകള്‍ ഈ ചിത്രങ്ങള്‍ പ്രചരിപ്പിക്കുന്നത്. ഇന്റര്‍നെറ്റ് എന്നത് സത്യം അറിയാനുളള സോഴ്‌സ് ആയിരിക്കണമെന്നും സപ്ന വ്യാസ് പട്ടേല്‍ തന്റെ സോഷ്യല്‍ മീഡിയ അക്കൗണ്ടുകളിലൂടെ ആളുകളോട് പറയുന്നു.
ഫിറ്റ്‌നസ് ട്രെയിനറായ സപ്ന വ്യാസ് പട്ടേലിനെ ഫേസ്ബുക്കില്‍ ലക്ഷക്കണക്കിന് പിന്തുടരുന്നുണ്ട്. മൈക്രോ ബ്ലോഗിങ് സൈറ്റായ ട്വിറ്ററില്‍ പതിനായിരത്തില്‍പ്പരം ഫോളോവേഴ്‌സ് ഉണ്ട്. ഇല്ലാക്കഥകളില്‍ പെട്ടുപോകുന്നനവര്‍ എന്ത് ചെയ്യണമെന്നും സപ്ന വ്യാസ് പട്ടേല്‍ തന്റെ ഫേസ്ബുക്ക് പോസ്റ്റുകളിലൂടെയും കമന്റുകളിലൂടെയും തന്നെ പിന്തുടരുന്ന ആളുകളോട് പറയുന്നു. ഇതിനിടെയാണ് ബി ജെ പി എം എല്‍ എ അംഗൂര്‍ലത ദേകയുടെ ചിത്രം കണ്ട് സിവിധായകന്‍ രാം ഗോപാല്‍ വര്‍മ അശ്ലീല പരാമര്‍ശം നടത്തിയത്.