ശബരിമലയിൽ യുവതീ പ്രവേശനം വിലക്കിയത് ദേവന്റെ അവകാശം പരിഗണിച്ചെന്ന് തന്ത്രി

ശബരിമലയിൽ യുവതീ പ്രവേശനം വിലക്കിയത് ദേവന്റെ അവകാശമെന്ന് തന്ത്രിയുടെ അഭിഭാഷകൻ വി ഗിരി സുപ്രീംകോടതിയിൽ. മറ്റു ക്ഷേത്രങ്ങൾപ്പോലെയല്ല ശബരിമല. അയ്യപ്പൻ നൈഷ്ഠിക ബ്രഹ്മചാരിയാണ്. ഹിന്ദുവിശ്വാസികളുടെ മൌലിക അവകാശങ്ങളും ദേവന്റെ അവകാശവും തുല്ല്യമാണെന്നും ഗിരി സുപ്രീംകോടതിയിൽ പറഞ്ഞു. ശബരിമല പ്രതിഷ്ഠയുടെ രക്ഷാധികാരി തന്ത്രിയാണെന്നും തന്ത്രിയുടെ അഭിഭാഷകൻ കോടതിയിൽ പറഞ്ഞു. 

ക്ഷേത്രാചാരങ്ങൾ റദ്ദാക്കിയത് ഭരണഘടനയുടെ 25-ാം അനുച്ഛേദത്തിന് എതിരാണെന്നും മതവിശ്വാസങ്ങൾ യുക്തിയുടെ അടിസ്ഥാനത്തിൽ പരിശോധിക്കാനാവില്ലെന്നും 15,17,25 അനുച്ഛേദങ്ങൾ പരിശോധിക്കുന്നതിൽ സുപ്രീംകോടതിക്ക് പിഴവ് സംഭവിച്ചെന്നും കെ പരാശരൻ കോടതിയിൽ വിശദീകരിച്ചു. യുവതികളെ ക്ഷേത്രത്തിൽ പ്രവേശിപ്പിക്കാത്തത് അയിത്തത്തിന്റെ അടിസ്ഥാനത്തിലല്ല. തൊട്ടുകൂടായ്മ കുറ്റകരമാണ്. ലിംഗവിവേചനം പാടില്ലെന്ന അനുച്ഛേദം മതസ്ഥാപനങ്ങൾക്ക് ബാധകമല്ലെന്നും പരാശരൻ കോടതിയിൽ പറഞ്ഞു. വിധിയിലെ പിഴവ് ചൂണ്ടിക്കാട്ടിയാൽ മതിയെന്ന് കോടതിയും വ്യക്തമാക്കി. 

തൊട്ടുകൂടായ്മയുടെ അടിസ്ഥാനത്തിൽ മാത്രമല്ല വിധിയെന്ന് ജസ്റ്റിസ് ആർ എഫ് നരിമാൻ പറഞ്ഞു. ശബരിമല വിധിയിലെ പിഴവെന്താണെന്ന് ഹർജിക്കാരോട് ചീഫ് ജസ്റ്റിസ് ചോദിച്ചിരിന്നു. മതവിശ്വാസത്തിനും അനുഷ്ഠാനങ്ങൾക്കും എതിരാണ് വിധിയെന്ന് എൻഎസ്എസിന്റെ അഭിഭാഷകൻ കെ പരാശരൻ കോടതിയിൽ പറഞ്ഞു. മതസ്ഥാപനങ്ങളെ പൊതുസ്ഥലങ്ങളായി പരിഗണിക്കാനാവില്ലെന്നും പരാശരൻ വാദിച്ചു. 

ശബരിമലയില്‍ പത്ത് വയസിനും 50 വയസിനും ഇടയില്‍ പ്രായമുള്ള സ്ത്രീകള്‍ക്ക് പ്രവേശനം അനുവദിച്ച സുപ്രീംകോടതി വിധി പുനഃപരിശോധിക്കണമെന്ന് ആവശ്യപ്പെട്ട് നല്‍കിയ ഹര്‍ജികള്‍ സുപ്രീംകോടതി ഭരണഘടന ബഞ്ച് പരിഗണിക്കുന്നു. 65 ഹര്‍ജികളാണ് ഈ വിഷയത്തില്‍ സമര്‍പ്പിക്കപ്പെട്ടത്. ഇതില്‍ 56 എണ്ണം പുനപരിശോധന ഹര്‍ജികളും നാല് എണ്ണം റിട്ട് ഹര്‍ജികളുമാണ്. ചീഫ് ജസ്റ്റിസ് രഞ്ജന്‍ ഗൊഗോയ്‍ അധ്യക്ഷനായ അഞ്ചംഗ ബഞ്ചാണ് ഹര്‍ജികള്‍ പരിഗണിക്കുന്നത്. ജനുവരി 22ന് പരിഗണിക്കേണ്ടിയിരുന്ന ഹര്‍ജികള്‍ ജസ്റ്റിസ് ഇന്ദു മല്‍ഹോത്ര അവധിയിലായിരുന്നത് കൊണ്ട് നീട്ടിവെക്കുകയായിരുന്നു.