വനിതാ മതില് ഏതെങ്കിലും ഒരു പ്രത്യേക വിഭാഗത്തിന്റേതല്ലെന്നും ജാതിമത ഭേദമില്ലാതെ എല്ലാവരെയും സ്വാഗതം ചെയ്യുമെന്നും വ്യക്തമാക്കി മുഖ്യമന്ത്രി പിണറായി വിജയൻ. വനിതാ മതില് ഒരു സാമൂഹ്യ മുന്നേറ്റമാണ്. നവോത്ഥാന സംഘടനകള് തന്നെ സ്ത്രീകളെ കൊണ്ടുവരും. വനിതാ മതിലില് പങ്കെടുക്കുന്നതില് നിന്ന് സ്ത്രീകളെയും സാമൂഹ്യ സംഘടനകളെയും തടയാന് ശ്രമം നടക്കുന്നുണ്ട്. എന്നാല് ഈ നീക്കത്തെ തട്ടിമാറ്റി വലിയ മുന്നേറ്റം ഉണ്ടാകും. വനിതാ മതില് സൃഷ്ടിക്കാനും വനിതകളെ മതിലില് പങ്കെടുപ്പിക്കാനും സര്ക്കാരിന്റെ പണം ഉപയോഗിക്കില്ലെന്നും മുഖ്യമന്ത്രി പറയുകയുണ്ടായി. ആചാരങ്ങള് ലംഘിക്കാനുള്ളതാണെന്നാണ് കേരളത്തിലെ നവോത്ഥാന നായകര് പഠിപ്പിച്ചത്. അത് മറക്കരുത്. ശ്രീ നാരായണ ഗുരു അരുവിപ്പുറത്ത് പ്രതിഷ്ഠ നടത്തിയത് ഇങ്ങനെയൊരു ആചാര ലംഘനമായിരുന്നുവെന്നും മുഖ്യമന്ത്രി കൂട്ടിച്ചേർത്തു.