പത്ത് ദിവസത്തെ ചോദ്യംചെയ്യലിന് ശേഷവും മുഖ്യപ്രതി പള്സര് സുനിയില്നിന്നോ കൂട്ടാളികളില്നിന്നോ കൂടുതല് വിവരങ്ങള് ലഭിക്കാത്തതിനെ തുടര്ന്ന് നടിയെ ആക്രമിച്ച കേസിന്െറ അന്വേഷണം പൊലീസ് അവസാനിപ്പിക്കുന്നു. സുനിയാണ് മുഖ്യ ആസൂത്രകനെന്ന നിഗമനത്തിലാണ് അന്വേഷണം അവസാനിപ്പിച്ച് കുറ്റപത്രം സമര്പ്പിക്കുക. കസ്റ്റഡി കാലാവധി അവസാനിച്ച പള്സര് സുനി, വിജീഷ് എന്നിവരെ വെള്ളിയാഴ്ച കോടതിയില് ഹാജരാക്കിയിരുന്നു. ഇവര് ഇപ്പോള് കാക്കനാട് ജയിലിലാണ്. ഇരുവരെയും പത്തുദിവസം പൊലീസ് ചോദ്യം ചെയ്തിട്ടും ഗൂഢാലോചന, ക്വട്ടേഷന് ബന്ധത്തിലേക്ക് വേണ്ടത്ര തെളിവ് ലഭിക്കാത്തതാണ് അന്വേഷണം അവസാനിപ്പിക്കാന് കാരണം. മൊബൈല് ഫോണ് കണ്ടെടുക്കാനാകാത്തതും സുനി മൊഴിമാറ്റിപ്പറയുന്നതും പൊലീസിന് തലവേദനയുണ്ടാക്കിയിരുന്നു. മൊഴി മാറ്റിപ്പറയുന്ന സാഹചര്യത്തില് നുണപരിശോധനക്ക് വിധേയമാക്കണമെന്ന ആവശ്യം പ്രതിയുടെ അഭിഭാഷകന് നിരാകരിച്ചതും പൊലീസിന്െറ കണക്കുകൂട്ടല് തെറ്റിച്ചു.